OpenAI-nin Kompüterinizi İdarə Edə Biləcək “Operator” Aləti Yaxın Zamanda Buraxıla Bilər

OpenAI, “Operator” adlı və kompüterinizdə sizin adınıza tapşırıqları yerinə yetirə bilən süni intellekt alətini istifadəyə verməyə hazırlaşır. Mütəxəssislərdən gələn məlumat sızmaları və şirkətin tətbiqi ilə veb saytında olan istinadlara əsaslanan hesabatlar bu alətin yanvar ayında təqdim oluna biləcəyini göstərir. ChatGPT istehsalçısının əsas rəqiblərindən biri olan Anthropic ötən il oxşar "kompüter istifadəsi" xüsusiyyətini təqdim etmişdi.

İşləri Avtomatlaşdıracaq

Operator, OpenAI-ın "agentic", yəni müstəqil qərarlar qəbul edib tətbiq edə bilən bir süni intellekt sistemi olacaq. Bu cür texnologiyalar süni intellekt agenti və ya vasitəçisi kimi də tanınır.

Əsas məqsəd istifadəçilərin iş yükünü azaltmaq üçün kod yazmaq, səyahət rezervasiyaları etmək kimi tapşırıqları avtomatlaşdırmaqdır. Lakin Operator təkcə bununla məhdudlaşmır. Alətin veb səhifələrdə gəzmək, virtual maşınlar qurmaq və daha mürəkkəb əməliyyatları icra etmək kimi imkanları da olacaq.

Test Nəticələri və Performansı

Operator-un test versiyalarında əldə edilən bəzi nəticələrə görə, bu alət veb əsaslı tapşırıqlarda insan performansına yaxın nəticələr göstərə bilir. Lakin bəzi kritik əməliyyatlarda uğur faizi hələ də aşağı səviyyədədir.

Məsələn, Operator bir Bitcoin cüzdanı yaratmaq tapşırığında cəmi 10% uğur faizi əldə edə bilib.

OSWorld platformasında Operator, real bir kompüter mühitini təqlid etmək üçün sınaqdan keçirilmiş və 38,1% nəticə göstərmişdir. Bu göstərici Anthropic-in kompüter idarəetmə modelindən yüksək olsa da, insan performansı ilə müqayisədə (72,4%) xeyli aşağıdır. Bununla yanaşı, WebVoyager adlı test platformasında Operator, veb səhifələrdə gəzmək və qarşılıqlı əlaqə qurmaq bacarıqları baxımından insan performansını ötüb.

Gələcəyin Süni İntellekt Bazarında Yeri

Bu nəticələr Operator-un bəzi tapşırıqlarda insan səviyyəsinə yaxın, digərlərində isə daha zəif olduğunu göstərir. Ən azından rəsmi olmayan məlumatlar belə bir mənzərə yaradır.

Bu arada, bazar araşdırma şirkəti Markets and Markets-in hesabatına görə, süni intellekt agentləri bazarı 2030-cu ilə qədər 47,1 milyard dollar dəyərində ola bilər. Bu isə göstərir ki, bu sahə yaxın illərdə daha da genişlənəcək və süni intellektin gündəlik həyatımızda rolu artacaq.